Ang tagsa ka tawo nagahandum sing
balay nga matawag nga puloy-an

Ni Antonio 'Jun' Joquino
KRIMEN kag KASUGUAN

(Hingapusan Nga Bahin)

BANGUD sang mapait nga nadangtan sang manghud sa mga kamut sang kaugalingon nga amay, nagdangup si Ruby sa ila kaparyentihan agud maluwas ini. Halus man sila makapati sa natabu kay Rosy. Daku ang ila pagkanugon nga naguba ang puturo sini, gani sa kaluoy kag kahanuklog, naghimbon sila kon diin dapat sila magpalapit sa pagpangayu sing bulig.

“Sa Commission on Human Rights kita makadto. Sa ila kita ma-report,” ang panugyan sang pila ka himata. “Pero, patundaan ta sini si Nanay mo sa Negros,” ang ila pa hambal kay Ruby.

Matapus nila pakigkitaan ang iloy nga si Vina, halus isa ka baragubay sila nga nagpadulong sa natungdan nga sanga sang gobierno sa siudad.